بحور اليأس

بحور اليأس
733795_174363109381991_1977534046_n

بقلم/ آمال عبد الحميد :

وبيكلمنى عن حلمه
وخايف لسة من بكرة
مهو الفارس فى حلم كبير
و أول خطوة فى التغيير
و خايف يبقى ده ذكرى
يموت الحلم ف العتمة
يموت ع القلم فكرة
ميكتبشى
ميرسمشى
حروف من نور
شعاع كامل مهوش مبتور
خطاوى تدور فوق السكة
متعطلشى
متقلقشى
مدام الحب ده ف ايدك
ولسة الحلم ف وريدك
متيأسشى
ومتسبهوش
بصوت طلقة ولا بخرطوش
وخلى الحلم فوق راسك
كما الراية
يرفرف يبقى نبراسك
وده هدفك وده الغاية
وأخرج من بحور يأسك
عشان جافية
بتاخدك جوفها بالعافية
وتفرشلك فى أرضك شوك
تطوفها بقدمك الحافية
فتصبح كل أيامك وأحلامك
كما المية اللى مش صافية
كليلة طويلة مش دافية
وبرد شديد يجمد كلمة
على ريقك
فتخرج بعد تفكيرك
قصيدة شعر بلا قافية
كلام مرسل .. معانى الفهم
غير كافية
وألف علامة استفهام
بتتضاعف مع الأيام
بتخنق حلمك أما تنام
فتسرق منك الأحلام
فأخرج من بحور يأسك
عشان بلدك عشان تفسك
مدام الشعر ده ف دمك
فطلع ع الورق همك
ومين تاعبك وايه ألمك
وقلمك حر بيعبر
و صوت المدنة بيكبر
وربك وحده بيدبر
هتدبر فما تخافشى
هتدبر فما تخافشى

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *