يسقط.. يحيا حكم العسكر..

يسقط.. يحيا حكم العسكر..
DSCF0946

بقلم – محمد لطفى :

انا جت بنتى شيرين مع اول هتاف يسقط يسقط حكم العسكر ودة كان الهتاف الجبار بتاع السادة الثوار.. ومع تعديل الهتاف الى يحيا يحيا حكم العسكر جاء الولد لطفى الصغير بس جاء مع تعديل المقرر اقصد الهتاف.

ومابين يسقط ويحيا السحل موجود والموت موجود والازمات موجودة بس انا مش عارف لو جاء مولود ثالث هايجى مع اى هتاف

وايضا مابين يسقط ويحيا الجيش مطحون وفى الشوارع مركون وشايل الطين .. يتحدف الطوب علية وبعد الحدف يدوى الهتاف الشهير .. الجيش والشعب ايد واحدة .. وايد بتحدف الطوب والتانية بتحضر المولوتوف .. وسلامى لازمة السولار اللى انا عرفت سببها.

ولو سالتنى السبب اقولك واضح وصريح بسبب تعبئة زجاجات المولوتوف بالجاز والبنزين يامتعلم يابتاع المدارس مش دة سبب ولا اية. واذا عرف السبب بطل العجب

والاول يسقط العسكر ودلوقتى يحيا العسكر وبقى موجود وصلة عشق وغرام مابين السادة الثوار والاحزاب اللى الناحية التانية .. يعنى خدوا بعض على حب لا ابدا ماكنش فية حب .. امال اية .. ممكن يكون جواز عرفى محدد المدة لحين الانتهاء من العدو اللدود.

ولو قلت لى مين العدو .. مش عاقول لك اعرف انت ياعم ماليش دعوة. وفى مصر بقينا اصحاب سياسة بس للاسف مفيش كياسة الكل دلوقتى فيلسوف تحليل وتعليق. لودخل الرجل يمين .. يتقال لا غلطان دة الشمال احسن ولو دخل شمال .. يزعل اهل اليمين ويقولوا ربنا ماتجعلنا من اهل الشمال .. ولو وقف يتقال علية كسلان ولو نطق يتقال علية ما بيعرفش يتكلم ولو سكت يتقال علية اخرس .. طيب الحل اية تقدر تقول يابتاع المدارس يا مسئول

 

 

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *