تعرفوا مين اللي هيبني مصر ؟؟؟

تعرفوا مين اللي هيبني مصر ؟؟؟
د/ايمان سلام

بقلم/ د. إيمان سلام
مدرس مساعد منتدب بكلية العلوم
رئيس مجلس إدارة جمعية إنقاذ حياة طفل بالإسكندرية والقاهرة ودمنهور:

س :: تعرفوا مين اللي هيبني مصر ؟؟؟

ج :: اطفال الشوارع !!

دا رأي لأنا سمعته من الاستاذ طارق حداد مقدم برنامج صباح نور الدنيا بقناة نور الدنيا.

لما فكرت في الكلام دا ,,,, حسيت انه فعلا منطقي ,,,, العيال دي غسيل و لبس ,,,, اتمرمطوا كتييير، لو قدرنا نوفر لهم حياة كريمة و عمل شريف بلدنا هتستفيد اكتر ما هما شخصيا هيستفيدوا.

من 8 شهور ::: لقينا طفل في الشارع اسمه احمد عنده 11 سنة في ميامي بالاسكندرية ,,,, كان محروق جامد في رجليه من راكية نار (دي حاجة كدا بيولعوها عشان الدفئ بالليل) , هو اتحرق في رجله لما كان نايم بالليل في الشارع ادامها. احمد في الاول مكانش عايز ييجي مع المتطوع اللي راحله بعربية عشان يوديه لدكتور حروق ,,, كان خايف اننا نسرق منه  كليته .

المهم لما كلموني و قالولي  انه خايف ,,, قررت انزله بجودي بنتي يمكن لما يشوفها يولفوا علي بعض و وجودها يكسر حاجز الخوف جواه ,,, و قد كان ,,, قعدنا كلنا معاه في الشارع وواحدة واحدة احمد ركب معانا ,,, و روحنا بيه للدكتور واتقرر له عمليتين، عملهم بفضل الله في مستشفي الهداية بالاسكندرية بتكلفة حوالي 5 الاف جنيه.

في الفترة دي عرفنا من احمد ان باباه شغال في مصنع بالحلمية ,,, روحنا و سألنا علي الاب وطمناه علي الولد اللي غايب بقاله سنتين ,,,  و معرفناش احمد اننا وصلنا لمكان والده عشان ميهربش مرة تانية ,,,, احمد في المرتين اللي فاق فيهم من البنج ,,,, كان يقوم يحط ايده علي جنبه ويطمن ان كليته موجودة !!

من يومين طفل تاني اسمه احمد 9 سنين ضربته عربية و هربت ,,, احمد احتاج نقل دم وشرايح ب 5600 ,,, المشكلة ان الولد ملوش ورق و المستشفي كانت عايزة تبلغ الشرطة والولاد اصحابه مرعوبين .

المهم شيرت البوست وبعد نص ساعة عرفت ان فيه 2000 اتوفروا وبعدها بنص ساعة وصلنا ل 2600 ,,,, كان معاهم وقتها دينا بركات صديقتي الصحفية ( كانت موجودة بصفتها الانسانية وليست المهنية) فسألت دينا : مين اللي جمع الفلوس بالسرعة دي …. قالتلي هما الولاد اصحاب احمد …. قلتلها ازاي ::: قالتلي نزلوا شحتوا عشان يجمعوا الفلوس دي, اتفقنا انا و دينا ان احنا اللي هندبر الفلوس دي لأن مينفعش انهم ينزلوا يشحتوا علي صاحبهم التعبان وبلغناهم اننا هنوفر الفلوس دي و إن دي مسئوليتنا إحنا، ومكنتش اتخيل اجابة الاولاد دول لانهم رفضوا بشدة اننا نساعدهم وهما ميتحركوش و علي العكس تماما !!!!!! ….

لقينا  فيهم واحد باع الموبيل اللي معاه ب 200 جنيه مع انه يساوي اكتر من كدا و التاني قالها يا طنط انا ممكن اروح ابيع كليتي!!! احنا بيفوت علينا ناس كتير واحنا قاعدين في الشارع و بيعرضوا علينا اننا نبيع كليتنا ليهم ,,, انا هبيع كليتي واكمل المبلغ !!!!!!!

الغريب: ان يومها موبيل دينا لما روحت ملقيتهوش معاها ,,, دورت كتير عليه واتصلت بالمكتب وفي الاخر استعوضت ربنا فيه.

ولما راحت تاني يوم المستشفي لقيت اصحاب احمد محضرين ليها الموبيل وبيعتذروا انهم مبلغوهاش لانه كان فاصل شحن !!!!!!!

كتيييير اوي من اللي متربيين في بيوت ومدارس اخر حاجة ,,, مش هيعملوا كدا ولا هيفكروا يساعدوا بالطريقة النبيلة دي صديقهم المصاب ,,, وأقرب حاجة هتتقال و احنا مالنا .

الولاد دول عاملين مع بعضهم مجتمع متكامل متضامن منفصل عن الواقع الزفت والهباب اللي احنا عايشين فيه .

دول مجتمع اخر اري انه ناجح بادواته المتاحة له في ظل غياب الدولة و المجتمع و الضمير .

العيال دول رجالة اوي ,,,, بس احنا اللي مش عارفين نستثمرهم …. دول مش متعودين علي بابي و مامي و الفطار في السرير ,,, و يا حبيبي روح المدرسة ,,,,, الولاد دول ميعرفوش حاجة اسمها دلع و لا تنطيع ,,,العيال دي عانت و شافت الذل في الشارع ,,,, لو قدرنا نوفر لهم شغل كريم و نستثمر طاقاتهم فيما يفيد ,,,,, هنكسب في نفسنا ثواب قبل ما نكسب  فيهم هما الثواب ,,,,, لان البديل انهم يكونوا بؤر اجرام في الشوارع ,,,, فكروا كدا شوية و حاولوا توصلوا لاليات استثمار الطاقات دي.

اللهم بلغت اللهم فاشهد
الي الله المشتكي.

 

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *