أطفال الشوارع .. خطر يهدد الأمن والسلم العام “من وجهة نظرهم” !!

أطفال الشوارع .. خطر يهدد الأمن والسلم العام “من وجهة نظرهم” !!
صافي بدر

بقلم/ صافي بدر:

ناس كتير بتتكلم عن أطفال الشوارع ونزولهم فى المظاهرات ووجودهم فى الاعتصامات والأحداث .. يا ترى مين اللى بعتهم ؟؟ يا ترى مين اللى زاققهم علشان يخربوا .. يا ترى ايه اللى مستفدينه من وجودهم .. وهل هما دول ثوار فعلا ؟؟ ولا موجودين علشان حد  قالهم روحوا المكان ده واضربوا طوب ومولوتوف.

عزيزى اللى بيقرا  .. إذا كنت من الناس اللى بتظهر تعاطف مع الأطفال المشرده اللى بيتقال عنهم أطفال الشوارع وبتاهجم وجودهم وسط الاحداث .. اسمحلى اقولك حضرتك طبقى وعنصرى .. اما اذا كنت من الناس اللى أصلا بتستنكر وجود هذه المخلوقات على وجه الأرض ومن وجهة نظرك بردوا ان الكائنات دى حلال فيها الاعدام علشان عاله على المجتمع يبقى حضرتك ما ينفعش تسمع الحلقه دى علشان مش حتكون على هواك ..

خلينا نتكلم الأول عن طفل الشارع وكيفية وصوله للشارع وبعدين نتكلم عن— هو ايه اللى وداهم هناك

  1. غالبا طفل الشارع ده يا إما بيكون من طبقه فقيره جدااا واسرته كلها فى الشارع

  2. يا إما الطفل ده كان عايش كويس وساب البيت من العنف اللى بيواجهه من أسرته

  3. يا إما هربان من الأحداث أو ملجأ .. إلخ إلخ

تعالى نمسك كده نقطه نقطه ونشوف ايه اسبابها وايه دوافع طفل الشارع فى أنه يكون ملهوش مأوى ولا لاقى مكان كويس ينام فيه ولا لاقى أكل ولا شرب ولا أسره

أولا :::  لو حضرتك نشأت فى أسره من كتر فقرها بتلم كرتون مثلا من الشوارع أو بتلم بلاستيك من صناديق الزباله أو بتبيع ورد وفل ومناديل فى الأشارات علشان تقدر تاكل ساندوتش فول أخر اليوم تفتكر حيكون عندك مستقبل ..؟ ؟ طب تفتكر ايه نوعية الناس اللى حتتعامل معاهم فى حياتك ؟؟ طب تفتكر ممكن تدخل مدرسه وتاخد دروس خصوصيه ؟؟ للأسف بقى ان فى ناس عايشه فعلا حياتها كده وما خُفى كان اعظم ..

أما بقى لو حضرتك نشأت فى أسره جاهله مثلا .. أو الأب أو الأم بيعاملوك معامله اقل ما توصف بقى انها مينفعش حيوان يتعامل بالمعامله دى يعنى مثلا .. لو علشان أتأخرت شوية فى المدرسه وكان غصب عنك اتربطت فى سرير لمدة يومين بتضرب بخرطوم أو مثلا علشان ما نزلتش الشغل النهارده علشان تعبان وغصب عنك (مع العلم ان معظم أطفال الشوارع اللى بيسيبوا البيت دول من 9 لـ 14) سنه وأخدت علقه نسيتك أسمك او زى ما بيقولوا .. ما اخدهاش حمار فى مطلع ده كمثال يعنى وبرد ( ما خفُى كان أعظم ).

واخيرا بقى لو حضرتك طلعت على وش الدنيا متعرفش انت ابن مين ولا جيت الدنيا دى ازاى .. متعرفش اتربيت فين ولا مين اللى رباك ولا أى حاجه عن تاريخك غير انك عايش فى ملجأ وبتتعامل معامله زباله غير مثلا لو انت فى الملجأ وبطبيعة انك عايش فى مكان مينفعش بردو حيوانات تعيش فيه (مش بنى أدمين ليهم روح ) ولقيت واحد من اللى فى الملجأ معاك بيقولك ده انا كنت عايش فى الشارع بره برنس وبنشم كله وبنعمل كل اللى أحنا عاوزينه ..

لو حضرتك لسه مقتنع أن أطفال الشوارع دول كائنات هُلاميه تستاهل الحرق والشنق ومينفعش يعيشوا معانا على الكوكب ده أسمحلى أقول لحضرتك انك معدوم الأنسانيه والضمير.

أما بقى عن وجود أطفال الشوارع فى المظاهرات والأعتصامات والأحداث فا حسيب حضرتك تسرح بخيالك شوية كده وحاول تحط نفسك كده مكان طفل مشرد مش لاقى مكان ينام فيه .. طفل مره واحده لقى ناس قاعده فى الشارع وناصبين خيام وبيتكلموا عن الحريه والديموقراطيه وحياة الفقرا وضرورة تطهير مؤسسات الدوله .. بس حضرتك طبعا مش فاهم اللى بيتقال علشان ما دخلتش مدرسه زيهم .. فا محتاج تفهم فا تقعد معاهم وغالباّ بيكونوا ناس نضيفه ومعاهم عربيات وبيحطوا برفانات غاليه ولابسين هدوم مش مقطعه .. ولقيت الناس دى بتاكل من اللى بتاكله وبيجرالهم فى الشارع نفس اللى بيجرالك وفى نفس الوقت الناس دى حنينه عليك .. وساعة الخطر بتخاف عليك اكتر ما بتخاف على نفسها .. علشان الناس دى عندها اّدميه وعارفه يعنى أيه روح طفل مرميه فى الشارع أكيد ولا بلا نقاش وبلا جدال لازم حتقعد مع الناس دى .. على الأقل بتلاقى لقمه كويسه وناس بتونسك فى الشارع بدل ما انت مرمى لوحدك .. بس قعدتك معاهم زرعت فيك حاجه كويسه .. لقيت الناس بتدور على حقهم وحقك بدل ما انت عايش فى الشارع بلا اهميه .. وبدأت بقى تتعرف على شباب من المعتصمين دول وعرفوا أسمك وبقيتوا صحاب .. ولقيت صاحبك الجديد ده اللى من الثوار مات !!

تعتقد ممكن تعمل ايه ؟؟ ماشى .. مش حطلب منك انك تعتقد .. حعتقد انا .. انا لو منه يا سيدى حولع فى اللى قتله .. وحكره أى حد لابس لبس الداخليه وحكره الدوله دى اكتر ما انا كارهها .. بقى يعنى هو الدوله مش قادره تبقى حنينه علينا ولا عاوزه الناس تبقى حنينه علينا ؟؟ يعنى يوم ما نلاقى شاب كويس بيعاملنى كأنسان كبير فعلا وعندى كرامه تقتلوه ؟؟ ليييييه يا كفره ..؟؟ أفتكر موقف كده وانا فى شارع محمد محمود لما الأمن المركزى كان لسه بيلعب معانا ومكنش لسه بدأ وصلة ضرب الغاز والرصاص الحى والخرطوش وكان لسه بيحدفنا بالطوب كنت واقف وسط الاشتباكات والطوب خلص منى وطيت على الارض علشان اجيب طوب تانى لقيت حد زقنى ووقعت على وشى ببص ورايا لقيت طفل عنده حوالى 12 سنه دماغه اتفتحت .. شيلته ورايح بيه المستشفى الميدانى بيقولى انا اللى زقيتك يا عمو !! بعد ما الولد فاق واتخيط قولتله انت زقيتنى ليه .. قالى ( يا عمى احنا متعودين على كده .. وبعدين ما احنا كلنا واقفين جامب بعض مش انت لو شوفتنى وانا بموت ممكن تيجى مكانى ؟ ) بعد الكلمتين دول انا معرفتش انطق كلمه وفضلت مبلم لدرجة انى مكنتش قادر امسك عنيا من الدموع .. الولد ده علمنى فعلا معنى كلمة رجولة وشجاعه واصرار وعزيمه ..

بعد الموقف ده بيومين فى اشتباكات سيمون بوليفار كنا قاعدين فى الصينية ولقيت كام ولد كده جايين يقعدوا جامبنا .. مره واحده لقيت ولد بيقولى .. ( هو احنا مش بنعمل كده للبلد ؟ ) قولتله أكيد يعنى امال انت معرض نفسك للموت ليه وما روحتش تبيع مناديل او تقعد مع صحابك تحت الكوبرى تشم كله .. قالى ( انا بعمل كده علشان نفسى ابقى حد كويس ونفسى ابقى زيكم كده وألبس حلو ويبقى عندى مراتى وعيالى ونفسى ميبقاش الواد ميدو بيشد كله علشان تعبان اوى من كتر الكله ومش عارف يبطلها ونفسى ابويا ياخدنى فى حضنه تانى بدل ما هو بيضربنى علشان عاوزنى اشتغل بالعافيه واجيبله سجاير كل يوم ..  بس هو انا لو مت حد حيفتكرنى ..؟؟ البلد دى حتفتكرنى وتفتكر انى كنت بعمل كده علشانها ؟ )

والأن عزيزى اللى بيقرا .. تفتكر العيال دى عايزه أيه من الدنيا ؟؟ تفتكر بياخدوا فلوس علشان ينزلوا يحرقوا ويولعوا ويحدفوا طوب .. تبقى لامؤاخذه حمار ومينفعش فيك الكلام

أخيرا ..

أطفال الشوارع دول ليهم حليين بس ومفيش غيرهم ..

الدوله توفرلهم مكسن وشغل وأكل نضيف وتحسسوهم انهم بنى أدمين وتعملولهم إعادة تأهيل – او  تجمعوهم فى مكان كده وترشوا عليهم شوية جاز بـ 5 جنيه وعود كبريت

فى الأخر القرار لضميركم ولأنسانيتكم .. ده لو لسه عندكم.

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *