المدار تقدم مجموعة من النصائح لمن ينوي شراء كاميرا جديدة

المدار تقدم مجموعة من النصائح لمن ينوي شراء كاميرا جديدة
كاميرا

كتب- معتز راشد:

الخطوه الأولى .. قبل ما تشتري الكاميرا خد معاك لاب توب وخد معاك USB مودم .. صور بالكاميرا صوره واحده وارفع الصوره على الموقع ده http://www.myshuttercount.com/
لو لاقيت صوره أو صورتين مافيش مشكله .. حتى لو كانت 10 .. لو لاقيت أنها أزيد من عشره وجايبة أرقام كتيره فى استخدام الشاتر إعرف إن الكاميرا دي اتصور بيها قبل كده ومش جديده واللى بيبعها ليك على أساس أنها جديد بيضحك عليك ..

الخطوه التانية .. جيب المود على M و اظبط الشاتر على 4000 وصور صور كتيره جدا .. تابع صوت الشاتر وتابع سرعه الشاتر .. لو قلقت من شئ إعرف إن الشاتر فى حاجه و انه مش ساير صح و فى مشكله بتعيقه عن انه يأدي عمله بكفائه ..

الخطوه الثالثه .. اتعود لما تشتري كاميرا تشتريها وقت النهار .. اخرج بالكاميرا بره المكان و خليك فى ضوء الشمس و ركب فيها عدسه و كرت ميموري .. و صور اى صوره لاى شخص سواء كان جي معاك او كان من المحل .. و زوم على الصوره و شوف ايه درجه الاهتزاز .. حاول تكون اديك ثابنه و حاول تجيب شاتر عالى فوق ال 500 او 1000 .. لو الوش مهزوز .. اعرف ان فى مشكله من ايدك او من الكاميرا او من العدسه نفسها ..

الخطوه الرابعه .. اتعود و انت رايح تشتري كاميرا متكونش فرحان و مبسوط و طاير .. لان اللى بيبع ذكي لو شاف فيك ده ممكن يغلى عليك السعر و يستغل الحاله النفسيه اللى انت فيها .. قبل ما تشتري ابحث و دور و اسأل و خد وقتك فى السؤال .. روح و تعاله و لف كذا مكان و اعرف الاسعار على النت و فى كل مكان بيتباع فى .. اعرف ان الاسعار بتختلف من مكان لمكان .. اعرف ان فى ناس استغربت جدا من ان سعر كاميرا هنا 6700 و هنا 6500 و هنا 7000 ..

الخطوه الخامسه .. اعرف الكاميرا صناعه ايه .. خد بالك ان الكاميرا الياباني ليها اوليه خاصه .. و فى كاميرات كتيره من تايلاند طبعا كخدمه و كفائه اقل من الكاميرا الياباني .. فى عدسات برضو انتاج صيني .. خد بالك ..

الخطوه السادسه .. فى مشكله كبيره بتواجه المصورين و بيشتكوا منها .. و هيا تهريب الفوكس .. العيب ده انتشر بشكل كبير فى الفتره الاخيره .. خد بالك منه و لازم تكون حريص و انت بتشتري العدسه او الكاميرا … المشكله ممكن تكون من واحده فيهم .. يا اما فى مشكله من فوكس ماتور الكاميرا يا اما العدسه مخبوطه .. برضو اتاكد من انك ظابط اعدادات الفوكس فى الكاميرا كويس .. مجيش دينماتك اريا .. او اوتو سلكت فوكس .. جيب فوكس بوينت و اعمل انت الفوكس بنفسك ..

الخطوه السابعه .. منظر الكاميرا و شكلها .. النظافه و اللمعان .. شكل الكتابه على الكاميرا و شكل الزراير .. لاحظ ده بدقه و شوف لو فى اى مسح او فى اى اثار لاى خدش او لاى شئ ماسح للكلمات اللى على الزراير ..

الخطوه الثامنه .. جيب فيديو الكاميرا ( ده لو فيها فيديو ) و سجل فيديو بأكبر مده ممكن يتسجيل بيها .. يعني مثلا خليك عشر دقائق بيصور فيديو .. العب بالفوكس العب بفتحه العدسه ( لو الكاميرا بتدعم اللعب فى فتحه العدسه اثناء تسجيل الفيديو ) اعمل زوم ان و زوم اوت بالعدسه اللى متركبه على الكاميرا … بعد كده جيب الفيديو و حطه على اللاب اللى معاك و شوف ايه درجه الكفائه .. و قبل ما تصور اظبط جميع اعداد الفيديو العاليه فى الكاميرا يعني لو فيها تصوير فيديو HD جيبه لو فى فيديو ب 720 برضو جيبه .. بعد العشر دقائق تصوير .. شوف الكاميرا ايه حلتها .. لو سخنت و حسيت بحراره منبعثه من الكاميرا .. اعرف ان فى اوفر لود على الكاميرا نفسها من البروسيسور .. و اعرف ان ده امر مش طبيعي و ان ده عيب فى الكاميرا ..

الخطوه التاسعه .. اتاكد من كل زرار فى الكاميرا .. شغال و لا لأ .. و بكفائه و لا لأ الدوس عليه سلس و لا لأ ..

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *