تخاريف محمد لطفى ..

تخاريف  محمد لطفى ..
DSCF0946

بقلم – محمد لطفى :

هو فية اية ودة مش عنوان فيلم محمد فؤاد وفؤادة فتحت الهويس غصب عن عتريس وجبهة الانقاذ عايزة تلغى الدستور غصب عن مرسى ومرسى فوق مرسى تحت ومرسى خد الكرسى بس الجبهة عايزة تضرب كرسى فى الكلوب.

مرة جمعة غضبانين ومرة جمعة زعلانيين ومرة جمعة مكملين وبعدة جمعة الرحيل وياسلام على جمعة الخلاص وخلاص ماحدش فاهم حاجة اصل الكل بيقول اى حاجة وانا عندى حاجة ساعة تروح وساعة تيجى.

وماتيجى نتكلم بالعقل.. ياعم هو عاد فية عقل دة انا الراجل الذى فقد عقلة وكرشة وطحالة.. طيب والنبة احياة ابوك سيب لى الكبدة علشان اتغدى بيها قبل ما تتعشى الانقاذ بيا ومرسى اتغدى بالعسكرى قبل ما يتعشى بية.

وارجع اقول هو فية اية .. رئيس على الكرسى ومعارضة عايزة الكرسى وجماعة ساندة الكرسى وشباب عايز يكسر الكرسى وحرب فى الشارع تلعن ابوة الكرسى وداخلية وجماعات بتقول لازم نحافظ على هيبة الكرسى.. طيب حد فاهم حاجة طيب اللى فاهم والنبى يجيب لية كرسى لاحسن انا رجلى تعبتنى من الواقفة .. واقوم اقف وانت بتكلمنى.

هو فية اية طيب مانغير عبر الصندوق مش عبر المولوتوف والطوب ونجيب اللى عايزينة بالانتخاب مش بالانتحاب.

هو فية اية .. ثوار الامس مع فلول اليوم ونور الامس ضد اخوان اليوم واعداء الامس اصدقاء اليوم وسبحان من لة الدوام.. ولو حد فاهم حاجة برجاء الاتصال ب 442.

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *