المدار تنشر ارشادات الخروج للميدان

المدار تنشر ارشادات الخروج للميدان
قنابل غاز

المدار:

أثناء التجهيز للخروج للتظاهر غدا قد تخفى عنك بعض المعلومات والاحتياطات المهمة قبل الخروج، المدار تنشر بعض النصائح للخروج للميدان، ومنها:

1- قبل النزول:

وانت نازل خد معاك كوفيه أو لاسة علشان تحميك من الغاز المسيل للدموع ومن أى دخان.

إلبس جاكيت أولا: لأنك مش عارف الجو حيكون عامل إزاى فحيحميك من البرد ثانيا لأنه حيحميك من الطوب أو أى حاجة تتحدف عليك.

ياريت كمان تاخد شنطة ومن الأفضل متكونش كبيرة علشان لو حصل كر وفر تعرف تهرب وتجرى بيها، حط فيها مبلغ يشيلك لمده إسبوع على الاقل وحط فيها إثبات شخصية بطاقة أو كارنيه كليه أو كارنيه نادى علشان لاقدر الله لو حصلك حاجة وياريت تعرف حد من صحابك إنك نازل وخليك على تواصل معاه علشان لاقدر الله لو اتقبض عليك أو حصلك حاجة يكون هو عارف علشان يبدأ يبلغ أهلك.

2- الاعتقال:

بالنسبة لو إتقبض عليك خلى خيار القبض عليك آخر حاجة .. حاول تجرى وتهرب.. من الذكاء ألا تعتقل من الأساس، فى حالة التقفيل عليك ولا توجد طريقة للهروب، استسلم حتى لا تصاب ويحصلك مكروه، أول ماتركب العربية لازم تفهم حاجة واحدة مهمة جدا .. إن فى جيش برة من المحامين والمنظمات والقنوات الفضائية هاتنقل الخبر وهاتدافع عنك مهما يحصل، بلاش خوف وفزع أهم حاجة ضبط النفس والهدوء فى الفترة الأولانية.

3- البنات:

البنات من حقك تنزلي ومن حقك تشاركى دا واجب وطنى بس علشان خاطر ربنا متورطيش شباب معاكى يعنى إبعدى عن منطقة الاشتباكات لأنك لو اتمسكتى حيطلع 20 شاب وراكى عايزين يهربوكى كلهم حيتقبض عليهم فخليكى بعيد عن الاشتباكات.

4- حدف الطوب:

بالنسبة للناس اللى حتبقى فى أول الصفوف بتحدف طوب يا تطلع تحدف قدام يا متحدفش من الأساس لأن النيران الصديقة بهدلتنا، وياريت تتقسم 3 صفوف صفين بيرموا طوب ورا بعض وصف وراهم بيكسرلهم الطوب.

5- التعامل مع البلطجية:

البلطجى بطبعة جبان ف أوعى تحسسه إنك خايف منه وأوعى تجرى لو جرى أثبت مكانك إحدف طوب إعمل صوت يكون مثلا كلمة (هجوووووووووووم) بصوت عالى حيخاف ويجرى، إوعى تجرى إنت لأنك كل ما تجرى حتكسبة أرض وحيقرب منك أكتر وأكتر.

9- التعامل مع قنابل الغاز:

قنابل الغاز الجديدة صعبة جدا غير قنابل 25 و 28 يناير خالص، فيه 5 طرق للتعامل معاها الطريقة الأولى شراء زجاجة شراب ميكو جيل المضاد للحموضة وخلطها بالماء بحيث يتم وضع ثلثين الكمية الموجودة بالزجاجة علي كمية من الماء توازي ثلث كمي الدواء وقوم بغسل وجهك جيدا بالتركية لتلافي أثار الغاز علي الوجهه والعينين.

الطريقة التانية وهى الكوكاكولا بتضيع مفعولها فى نفس الوقت.

الطريقة الثالثة وهى الخل بشرط تاخد بالك إنك قافل عينك كويس ويكون مخفف لأنه تقيل.

الطريقة الرابعة وهى مية بخميرة.

الطريقة الخامسة وهى البصل تاخد البصلة تفركها بأيدك وتشمها.

فى حالة انك أخدت أكبر كميه غاز أقرب مكان على جنب وأسف فى اللفظ رجع على طول، بالنسبة لمكان نزول القنبله اجرى فى عكس سير الهواء لأن الغاز حيبدأ يمشى مع الهواء.

10- الناس اللى قاعدة فى البيوت:

ياريت أول طلب منكم تقفوا فى البلكونات تحدفوا للمتظاهرين مايه أو أى فاكهة عندكم، والأهم بقى تفتحوا الواى فاى، لأن الانترنت حيكون أسرع مصدر لنقل الأحداث.

11- الفوتوجرافرز:

وما أكثرهم، من العيب إن يحصل حدث زى دا مش بيتكرر ومتنزلش تصور خد الكاميرا وتنزل صور.

12- شباب الموتوسيكلات:

وما أكثرهم برضو، انزل علشان لو فيه ناس مصابة نلحق ننقذهم صدقنى انك كدة حتشارك فى الثورة.

13- الشعارات:

احنا مش نازلين نقول شوية شعارات ونمشى ولكن مهم اننا نقول الشعارات الصبح علشان نلهب حماس الناس، ياريت اللى حافظين شعارات يقفوا قدام ويريحوا بعض.

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *