مع المعارضة المصرية مش هتقدر تغمض عنيك

مع  المعارضة المصرية مش هتقدر تغمض عنيك
د/ايمان سلام

بقلم/ د/ ايمان رجب سلام

مدرس مساعد منتدب بكلية العلوم

رئيس مجلس ادارة جمعية انقاذ حياة طفل بالاسكندرية و القاهرة و البحيرة:

تعليق أحمد خيرى المتحدث الرسمي باسم المصريين الأحرار علي خطبة د /  محمد العريفي :

أن السعادة المبالغ بها التى تنتاب المصريين فور سماعهم لكلمات الثناء من أحد الدعاة يؤكد قلة ثقتهم بأنفسهم.

و تعليقي :

هو أنا عايزة أصحح بس وأقول أن الشعب المصري مش فاقد الثقة في نفسه زي ما أحمد خيري معتقد ,,,,,, هو فاقد الثقة فيكم وفي طريقة أغرب سلوك معارضة ينطبق عليه قول الشاعر ( مش هتقدر تغمض عنيك ) زي مثلا واحد منهم دكتور في الهندسة يجيب خروف ويطلع بيه في برنامج عشان يعارض !!

والتاني يعمل حوار مع مجلة المانية ويقولها اللي بيحطوا الدستور مش معترفين بالهولوكوست بدل ما يقولهم تعالوا استثمروا في البلد وشغلوا الغلابة اللي مش لاقيين ياكلوا ,,,, أو يعمل معاهم اتفاقيات لتبادل الخبرات في الصناعة خصوصا الأجهزة الطبية اللي هما اساتذة فيها جدا عشان الغلابة اللي بيموتوا بالالاف سنويا في المستشفيات العامة !! او يشجع حتي السياحة عشان الناس تاكل عيش، ولا خلاص كل مشاكلنا انحصرت في الهولوكوست اللي معظم الشعب المصري ميعرفش يعني إيه ولا معابد بوذا اللي مش موجودة ولا الاغاني اللي معرفش مين مش بيسمعها !!

و التالت يطلع في برنامج ويطالب بالزواج المدني اللي ممكن من خلاله المسلمة تتزوج مسيحي والسبب بكل بساطة أنه كدا هيكون متسق مع مبادئه و قناعاته، طب و أخبار الاتساق مع الدين ايه,, و ايه اخبار الاتساق واحنا بنتحاسب أدام ربنا !!!! هي الناس دي نسيت اننا مجتمع متدين بطبيعته سواء مسلمين او مسيحين، و السؤال الأهم هي الناس دي نسيت إن في ربنا.

والرابع بينصح الغرب نصيحة اخ ويقول ان المناخ في مصر لا يناسب الاستثمار عشان كرسي زائل، والخامس بيستقوي بالغرب و عايزه يدخل عشان يحل مشاكلنا ويجيب حقوقنا .

وطبعا مكنش غريب نهائي إن الميكس دا يطلع بالبلوة الكبيرة المدعوة (جبهة الانقاذ) اللي سبقت عصرها وأوانها في الانقاذ بصراحة الجبهة دي عملت اللي عليها وزيادة. دا كفاية أنها انقذت الفلول وطلعتهم ثوار شرفاء وخليت اللي خططوا ونفذوا موقعة الجمل يرفعوا شعارات الثورة ( عيش – حرية – عدالة اجتماعية – كرامة انسانية ).

عموما الدكتور العريفي مجاش يقولنا إننا مجتمع جاااااهل فاقد للاهلية ,,,,, ملناش أي قيمة زي ما المعارضة بتقول.

الدكتور العريفي سرد حقائق تاريخية بتقول أن المصريين دول عظماء وقرر واقعا موجود علي الأرض أننا كيان واحد مينفعش يتفرق ,,,,, الراجل لم يسفه احد ,,,, لم يقصي احد ,,,, لو يخون احد ,,,, لو يكفر احد.

و أنا اقوله ::::: جزاكم الله خيرا :::: كتر خيرك :::: قلت كلام مجاش من ناس كتييييييير جوا مصر .

بالمناسبة اللي هيقرا الكلمتين دول من التيم التاني في الماتش المهبب اللي بيتلعب واللي زينا ملوش أي دور فيه ميفرحش اوي ,,,,, لأن أنتم برده حالكم يغم ,,,,, أقله هما أخطاءهم بتعيب شخوصهم فقط ,,, أما أخطاءكم انتم للاسف بتلبس في الدين ,,,,

وإلي الله المشتكي

وأخيرا :::تعودت ان اختم كل مقال لي بهذا الدعاء

اللهم فك قيد سجناء الرأي و حب الوطن ,,,,, ضباط 8 ابريل

اما اليوم فاخيرا حصل في مصر حاجة صح الواحد يفرح بيها في وسط الغم دا كله اخيرا في حد أخد جزء من حقه الضايع وبالتالي من نفسي اختمه بتهنئة من القلب  و أقول:

أنتم سجناء الرأي و حب الوطن . انتم من اشرف من انجبت مصر. انتم من جاهدتم افضل الجهاد و هو قول الحق عند سلطان جائر.

الف مليون  حمد الله علي السلامة و الله بيكم الواحد بيحس ان الدنيا لسة بخير و في رجالة الواحد يتسند عليهم وقت الشدة.

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *