بالفيديو : اهالى الطابيه يستغيثون و MBC تعرض مشكلتهم ، “مهران” لا وجود للادارة المحلية بالاسكندرية

بالفيديو : اهالى الطابيه يستغيثون و MBC تعرض مشكلتهم ، “مهران” لا وجود للادارة المحلية بالاسكندرية
الطابيه

عبلة عبد الحليم – الاسكندرية Mbc & المدار : شيرين البلتاجى :

و لقد كرّمنا بنى آدم” هكذا قال سبحانه و تعالى عن خلقه و لكننا فى زمن لا يعرف للانسان قيمة،منطقة “الطابية” احدالمناطق المنسية والتى تضم خمس قرى وتقطنها العديد من الاسر، لكنها بلا خدمات ويعانى سكانها من الاهمال فى الصحة، والتعليم والكهرباء ولا يشعر المسؤولون ان تلك المنطقة بشر مثلهم، و لم يرحمهم احد حتى الذئاب والكلاب المسعورة هجمت عليهم ليصبحو فريسة للانسان و الحيوان، و ينطبق عليهم المثل القائل : تأتى المصائب فرادى ولكن عليهم بالجملة.

عم منصور أحد قاطني منطقة الطابية الموبوءة، يقول:”هنا شبه معدومين من الحاجات اللى هى أصلا خدمات، وهم جم عملوا كابلات كهرباء لأن الأسلاك القديمة كانت بتكهرب الستات اللى بتنشر واللى فوق كان بيتكهرب واللى تحت بيكهرب. طب ياجماعة وصلوا الكابلات لحد الأخر يقولك لأ خلاص كده كأن اللى هناك دول مالهومش حق، دى حاجة، الحاجة التانيه لو أنت بصيتى فى الترعه اللى وراه حاتلاقى فيها زباله وورد النيل والعيال الصغيره زى ما أنت شايفه كده، دى حاجه الحاجه التانيه الكلاب هجمت علينا من اللى من الغيطان كلت مننا هنا ثلاث عيال والله العظيم زى ما بقول لك وحاتلاقى أثار الخياطه فى وشوشهم الحاجه التانيه لو أحنا بصينا هنا نلاقى نموس ودود الدود بيطلع من الأرض يعنى أحنا عاوزين حد يبص شويه هنا إلا أحنا منسين خالص”.

إنها الحقيقة ليست إدعائات ففى منطقة هذا الرجل تجمعت المصائب لتلقى بظلالها على أهل منطقة الطابية وتحرمهم من حياة كريمة وتدفع بهم لمصائب عديدة وصرخاتهم تعلو وتهبط سدى دون جدوى…. إنهم أهالى عشوائيات الطابية.

زينب حسن من أهالي القرية تقول:”أنا عندى عيلين غرقانين فى الترع واحد عنده 9 سنين وواحد عنده خمس سنين قغدنا أربع أيام ندور عليهم مالقناهمش عاموا على الترع وقبلها كان غرقانين عيلين برضه بنت عندها 12 سنه ما هنا ورانا ترع والميه خشه بيوتنا”.

الحاج أحمد بدر رجل أخر من أهالى الطابية قال:”والله حضرتك أكثر المشاكل اللى بنعانوا منها المصرف ده والترعه لأن الترعه والمصرف كلهم زباله والسبب صرف صحى وصرف أراضى وعندنا العيال كلهم أكثرهم تعبانين بسبب لموأخذه الريحه اللى بتطلع علينا .ولما بيتسد البابور اللى بيطلع من الصرف الصحى العمومى ده بيعوم علينا، حضرتك الترعه اللى وراء واللى هنا لما الأثنين بينطبقوا على بعض الميه دى بتعلى ودى بتعلى كلمنا المسؤولين وكلمنا الضابط بتاع القسم والكل جم عاينوا والسلام عليكم عليكم السلام”.

وإذا كانت القرية تحاط بمشاكل خدمية بحتة فما بال الهجمات المتكررة من كلاب مسعورة على أهالى القرية ربما تكون نوع من أنواعها يسمى السلعوة

سيده أخرى تقال:”بكسر طوب علشان أعمل سور علشان عيالى ما تقعش فى الترعه علشان ماحدش يقع منهم حد وقع قبل كده أيوه أبنى وقع قبل كده وطلعته نطيت وراه وجبته أنا ماعنديش سور على الترعه والباب بيتفتح على العيال وبتنزل” وتضيف:” مشاكل كتير نزاجهها، كالكلاب، ابنى قبل كده الكلب عضه وعملت له عملية ترقيع وفاضل له عملية تجميل وعمليه يعدل الفك وفاضل له عملية زرع عصب ..و جه كلب طلع عليه هو وابن جيراننا فا جه الكلب أكله من ذقنه من هنا وأكل ابن جيرانا من وشه من هنا بس لما أكل ابنى كل أكل جامد فاأكل اللحم كله فعملنا له عملية ترقيع”.

سيدة أخرى من أهالى القرية تقول:”الكلب جه عض الأولاد عض ثلاثه بنت كبيره وعيل قد محمد وعيل تانى جارنا نط من الجه دى وعدا وسبنا والبنت كانت بتلعب هنا وراح واخد الولد التانى من وسط العيال وراح ايه مسكوه من بقه ومسك الفك بتاعه وعمل الفك بتاعه من بعضه  أنا جريت على الولد أخذته منه راح شادد منى الولد وابنى راح ينده حد من البيت راح جرى على اينى علشان لابس أصفر وهو كلب مسعور واللون شده فمسك ابنى بقى ابنى طالع نازل كده طلعت تجرى عليه أخت الولد التانى علشان تأخذه منه أخذته منه مرتين ثلاثه وهو يشده منها راح متغاظ منها راح عضها منايديها من هنا  رحنا واخدينهم ورحنا طلعين بيهم على المستشفى”.

ناهيك عن الأمراض التى تصيب غالبية أهلها فالمصائب لم تترك بيتا إلا أصابته فها هو سيد يعاني من الصرع وأخته التى تخدمه مريضة بالقلب وقد حرمت على نفسها الزواج لتخدم أخاها… وأمه تعانى العديد من الأمراض أيضا فرب العائلة يعمل تباع ولا يستطيع أن ينفق على أهل بيته المكون من عشرة أولاد والوجيعة كلها هو الابن المريض سيد.

تيسير رجب محمد أخت سيد المصاب بالصرع تقول:”من وهو عنده 8 شهور كان سببها إنه وقع على دماغه فى الشارع وبعدين جاء له ميه على دماغه وجاء له ضمور فى المخ فجرينا علشان نعمل له عمليه فالدكتور قال لو عمل عمليه حايموت فيها ومن ساعتها وهو عاجز كده وبيأخذ برشام للصرع بقى له كام سنه وهو دلوقتى عنده 23 سنه وبيأخذ علاج للصرع وبرشام للسخونيه وبرشام تانى ياما وأنا فى مستشفى جيهان عمله عمليتى عمله فيها ثلاث صمامت فى القلب وهبت حياتى علشانه أحنا 8 بنات وولدين السيد ومحمد بس أحنا ماتعلمناش”.

والدة سيد تقول:”والله ظروفنا تعبانه وأنا عندى وأنا عيانه عندى القلب وعندى قصور فى القلب وعندى المراره وعندى روماتيزم تعبانه يعنى”.

قرية تجمع فيها كل المصائب فأصبحت مكان يعانى من قلة الأمكانيات ومن العديد من الأمراض وفقر فى الخدمات فما سر بعدها عن مسامع المسؤولين.

اللواء أحمد صالح الإدكاوى سكرتير عام محافظة اسكندرية قال:”من ضمن الأماكن المرصودة كعشوائيات هى منطقة الطابية، وفيه تنسيق بيتم بينا وبين وحدة تنسيق العشوائيات فى مجلس الوزراء فى القاهرة وبيترصد بس احنا بدأين فى أماكن جوه منطقة الإسكندرية أكيد سيطال التطوير هذه المنطقة فا موضوع العشوائيات دة موضوع كبير ومكلف للدوله ولكن الدوله مش واقفة فيه احنا بدأنا بأماكن موجودة جوه اسكندرية ومؤثرة وفيها خطورة”.

وعود سمعناها من قبل فربما نجدها تنفذ لصالح المواطن كما نفذت مشروعات أخرى من زمن ليس ببعيد.

كما اكد المهندس “محمود مهران” رئيس حزب مصر الثورة من خلال مقابله على قناة mbc في برنامج ام بي سي في اسبوع على تجاهل المسئولين بالاسكندرية لمشاكل المدينه ومعاناه اهالى الطابيه من التلوث والتهميش واشار الى ان اهالى الاسكندرية لا يستشعرون بوجود المحافظ ونائبه والمسئولين بالاسكندرية .

وهو مااكدته مذيعه برنامج ام بي سي فى اسبوع “علا الفارس” ان المسئولين غير موجودين وانها حاولت ان تصل لهم ولم تجد اي رد قائله “ازيدك من الشعر بيت حتي برنامج ام بي سي في اسبوع حاول التواصل مع المسئولين بالاسكندرية لكن لا حياه لمن تنادى” لكن نتمني ان نكون من خلال هذا التقرير وهذه المقابله سلطنا الضوء على مشكله اهالى الطابيه لعل وعسي .

وقال “مهران” ان اهالى الطابيه يعيشون في كارثه حقيقيه حيث ان نسبه التلوث تصل الى 60% واستكمل انهم لا يستطيعون دفن موتاهم فى المقابر التى تريد المحافظه الاستيلاء عليها حيث ان المدافن تعاني من مشكله المياه الجوفيه فاضطروا الى ردمها لرفع منسوب الارض كما قال ان اكثر اهالى الطابيه يعانون من امراض مستعصيه مثل الكبد الوبائي نتيجه ارتفاع نسبه التلوث من شركات الاسمده والورق الموجوده بمنطقه الطابيه ونتيجه عدم وجود صرف بالمنطقه ودخول المياه الى منازلهم.

كما استنكر “مهران” عدم تعيين ابناء اهالى منطقه الطابيه يهذه الشركات التى تتسبب في ضررهم مما تنتنجه من تلوث من الغازات التى تصدر من هذه الشركات قائلاً كيف يكونون هم سبب التلوث وسبب موت اهالى الطابيه ولا يريدون تعيين ابنائهم حيث ان بهم حاصلين علي شهادات عليا ومتوسطه مشيراً الى ان المظاهرات التى قام بها الاهالى امام شركه ابو قير للاسمده لتعيين اولادهم نتاج طبيعي للفقر والجوع وعدم ايجاد قوت يومهم.

واخيراً قال “مهران” ان الحل يكمن في تدخل سريع من المحافظه والبيئه لان البنيه الاساسيه متهالكه وتحتاج الى تعديل شامل.

 

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *