عزيزى المسلم

عزيزى المسلم
ابرام سعد

بقلم – ابرام سعد:


أخي المصري المسلم..

تحية وبعد..

في البداية كل عام وانت بخير وفرحان ودايماً من نجاح لنجاح وفي المناسبة السعيدة دي بس حابب اتكلم معاك بصراحة شوية ، انا عارف انك في عيد والوقت مش مناسب لكن معلش استحمل أخوك.

عايزك تتخيل معايا شوية حاجات :

 

– تخيل كدة لو كل يوم جمعة تلاقي صوت القسيس في الكنيسة مسمع الشارع كله وبينبة اننا منعيدش علي المسلمين الكفرة في اعيادهم .

 

– طب تخيل لو حصلت عركة كبيرة في الشارع وبالصدفة كانت بين مسيحي ومسلم وتسمع ان في حد مات ، ساعتها تتمني ان المسلم هو الي يكون مات علشان المسيحي المفتري ميقلبهاش فتنة طائفية ويولعلنا في مسجد .

 

– طب تخيل كدة لما رئيس الجمهورية بتاع بلدك يقول خطاب للشعب من جوة الكنيسة هتحس بأيه ؟؟

 

– طب لو لقيت جماعة زي جماعة الأخوان المسحيين مكوشة علي البلد كلها و حاسس انك مش هتاخد حقك فيها .

 

-طب لما تلاقي نفس الجماعة يطلع منها رئيس جمهورية يوعد انه هيعين نائب مسلم واول لما يوصل للحكم يطلع كلامه فشنك

 

– طب لما مسجدك يولع وبيوتك تتدمر ومحلاتك تتنهب وتلاقي حل المشكلة في جلسة عرفية ولا تحل ولا تربط .

 

– طب لما متلاقيش مشهد القسيس و الشيخ وهما بيحضنوا بعض الا في الميادين ولما تيجي تبص علي حياتنا العادية متلاقيش الكلام ده الا في التلفيزيون .

 

– طب لما تلاقي قسيس يطلع فتوي ان الي يتبرع لمدينة العلوم بتاعت زويل يبقا كافر لانه بيتبرع لواحد مسلم .

 

–  طب لما تلاقي اخوك المسيحي وصاحبك والي متربي معاك عارف ده كويس بس مش عارف يعملك حاجة !!

وقتها تسأل نفسك هو الغلط فين ؟؟

 

– لما تلاقي الناس سايبة البلد تولع وبيتعاركوا علي المادة التانية في الدستور الي بتقول ان المسيحية هي مصدر التشريع ولما تيجي تسأل من هنا او من هنا تلاقي الناس مش عاجبها الحال وبتقول طول عمرنا اخوات !!

تيجي برضك تسأل نفسك طب هو فين الغلط ؟؟

 

– طب لما شيخ الأزهر يموت ورئيس مجلس الشعب المسيحي يطلب من الناس تقف دقيقة حداد وتلاقي مجموعة ترفض تقوم ولما تسأل مين دول ؟ يقولولك دو السلفيين المسيحيين وقتها هتحس بأيه ؟؟

والمفروض موقفك منهم هيبقا ايه ؟؟

 

– طب لما تبقا كل مشكلتك انك تعيش في سلام وتحتكم بشرائعك بس كدة ، وحتي الأحلام البسيطة مش لاقيها.

وقتها هتعمل ايه ؟؟

 

– طب لما بناتك تتخطف وهم قصر مكملوش 18 سنة من جماعات غير معروفة !!

وبعد شهور تلاقيهم طالعين يقولولك دول بقوا مسيحيين ومتجوزين كمان وقتها هتقول ايه وهتحس بايه ؟؟

 

– طب لما مسلم يبقا مسيحي تلاقي افراح وزغاريد والدنيا هايصة ومحدش يقدر يتكلم ولو حصل العكس الدنيا تقوم متقعدش

وقتها هتحس بايه ؟؟

 

كفاية كدة.. علشان مطولش عليك وتقدر تعيد بس كل الي حابب اوصله اننا بنحبكم بجد ونفسنا نعرف فين الغلط ؟؟؟

مش بلومك علي اد ما بشاركك حالتي وعايزك تشاركني اننا ندور علي حل بجد بعيد عن الجلسات العرفية والمشهد الي مبيتغرش للقسيس والشيخ

ببساطة…. عايزين نفهم فين الغلط ؟؟؟

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *