بحبك

بحبك
احمد عبد النبي

شعر- احمد عبد النبى:

بحبك

جمال العشق مترسب ما بين عينك وبين خدك

بشوفك.. يطل النور على جبينى

فلاقينى

بكون حساد لكل ما فيا

عشان قادر يكون جنبك

انا

بحبك..

زمان وانا لسايا فى طفولتى

تملى كنت بستغرب

يقول عاشق وانا دايبة

فاقول على الحالة بين الناس

عقول خايبة

واستهون واتهازى

ويجرى العمر

وانا اكبر

تيجى الصدفة

نتقابل

واصدق فى اللى كدبته

وانا صغير

واحس الحب شىء عاقل

لكن من كتره جن جنون

ما هو اللى يلاقى قلب حنون

وروح دافية وعين صافية

وخير طيار على رحابه

ونور فياض على سحابه

يشق الغيم وبيعدى

وهو يسيبه ويعدى

اكيد جاحد

مفيش واحد

 يلاقى الحب

يحلف بيه

غير اما يكون صحيح

مجنون

اقولك حاجة من قلبى

بحس كتير وانا معاكى

بانى لسة طفل صغير

بيجرى جوه ارض الحضن

ويتشعبط فى كف الشجرة

لما يطل فوق قلبه

فيجلى الحزن

بحسك ام

واحس كتير بانى حتة من قلبك

ما طيبتك

شعاع مرسوم فى نور الصبح واصلى

وجايب لى معاه مرسال

يادوب اقراه

فاجرى بلهفة وأصلى

 الف حمد وشكر

ويتبدل فى جوفى الحال

مهما اكون بهتان

شروقك جوه احضانى

باول مرة يوصل فيها جواب

بخطك جوه عنوانى

علمنى اكون انسان

وعلمنى بانى اغير

وأحس واحن واتعشق

فى روح الخير

ما دام انتى اللى جايباها

محدش غير

بحبك

كلمة مش سهلة

عقود الدنيا جواها

وربط الحالة وصاحبها

وصاحبتها اللى بهواها

وكل الجى والماضى

وحلمى بانى اكون راضى

ودوخة قلبى فى الايام

لو انتى تغيبى عن عينى

واقولها القاكى وحشاها

وصبرى فى عز تجريحى

عشان مستنى تفاريحى

مجرد ما انتى من همسك

تقولى لى انا وياك

فاحس بانى انا لامسك

فيرتاح قلبى يضربنى

بخفة دم ويقولى

بلاش تتعب

حبيبتك احلى طير فى سماك

ومهما الدنيا هتغرب

هيخرج من عينيها النور

ينور لك سواد الليل

عشان تسهر ويجى شعور

فتكتب شعر

لاجمل حب فى دنياك

 

كلامى مهما طال او قل

انا اصغر كتير م الوصف

و التشكيل

و ملياش حل

بحبك زى ما تكونى

ما دام متلونة بلونى

مادام بتونسى كونى

ما دام باقية ولا تهونى

ما دام حابك

ومتشبك فى كل سبيل فى طرقاتك

ومتعلى مع راياتك

ومصيرى بانى ابقالك

فى كل الباقى فى حياتك

فهفضل كل ايامى

اقولهالك

بحبك

 

 

التعليقات

  1. بجد يا احمد مهما اقول عن كلامك مش لاقيه اكتر من
    رووووووووووعة يا ابن بلدي ربنا يوفقك يا اديب

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *