مهما حصل

مهما حصل
Mohamed Mahran محمد مهران

بقلم – محمد مهران :

يا اخواننا ياللى قاعدين للساقطة واللاقطة.. وبترددوا فى اللى اتقال وتزودوا فى كلام ما اتقالش وتغنوا على الموال اللى قال وماقالش وحكاية ومافيش فايدة واللى حصل وماحصلش تعالوا بيننا نقف مع نفسنا ومانطولشى الفساد اللى احنا فيه ده مرض عصري وفى كل العالم بيدور.. الفرق بيننا وبين غيرنا ان احنامابنقاومش من جهلنا  وعدم احساسنا  بمسؤولية بلدنا وشعبنا.. الحكومة فى أى عالم غير عالمنا متقدرش تصلح أمور شعبها لوحدها.. لازم مشاركة وايجابية..

وكل واحد فينا يصلح على أد مايقدر.. لكن للأسف  احنا بنرمى كل مشاكلنا وبلاوينا  على الحكومة وهى الحكومة.. مين غير ولادنا واخوتنا وأهلنا؟! ومافيش واحد فيها أجنبي.. كلهم من مصرنا لكن مايقدر على القدرة الا ربنا.. مش معنى ان احنا بنقول فيه عيوب وفيه مشاكل فيه فساد ان احنا بنشوه الصورة اللى فيها كلنا.. لا أحنا بنكبر الصورة اللى فيها مشكلة.. وبنوضحها علشان اى واحد من مسؤولينا يحلها لنا لكن مش معنى ان فيه مشاكل وفساد فى المجتمع يبقى خلاص يعوض ربنا.. لا دى حلاوة الدنيا والعيشة ومشاكلها وقدرتنا على حلها.. ببساطة من غير ما نجرح بعضنا.. ونتهم بعضنا بالتقصير.. لا كل حاجة فى أمور حياتنا واماننا مكلف بيها واحد مننا..

لكن لازم ناخد بالنا انه انسان والكمال لله واحده ومش هيقدر كل انسان مسؤول انه يحقق نتيجة 100% لكن على أد ما يقدر يبذل مجهود ويحاول يرضينا كلنا.. الحمد لله احنا احسن بكتير من كل اللى حولنا ..والخير موجود بينا  لسه بنعرف العيب والكرم الطيبة وحب الخير.. دى اكتر حاجة عندنا .

 لسه عندنا مشاعر وأحاسيس غير الغرب ..وكل الناس بترتاح وسطنا.. ومهما اختلفنا مع بعضنا عمرماهيكون بينا ضغائن ولااحقاد.. وبيت واحد بيلمنا.. ولو عاوز تعرف مصر الطيبة أسئل عليها فى كل الحوارى وشوف الجار لما بيختلف مع جارة وفجأة تحصل حاجة تلاقى الكل يجرى و ننسى زعلنا مع بعضنا.. وقلوبنا بيضة وطيبة ومصر حضن يضمنا لو افترقنا عنها دقائق الشوق يلهلب قلبنا.

ولو حد فكر بس يضرها.. بنطلع فيه همنا ونوري له ان بلدنا اغلى وافضل حاجة عندنا ..لسه الخير موجود.. والحب ماله حدود ..والصبر على المكتوب.. والرضا فى  قلبنا.

ياخلق ياللى نفسكم تفرقوا وتشتتوا وتقطعوا فينا كلنا مش ممكن يوم تنجحوا لأن الروابط بيننا كبيرة ومتينة مهما حصل لنا.

التعليقات

  1. انتا انسان رائع ربنا يكتر من امثالك لان فيه اعداء كتيرة اوى بتحاول تقطع فينا المفروض اننا نفوق ونقوم بثورة على نفسنا احنا كل واحد يشوف العيوب اللى فيه ويحاول يعالجها احنا بنمر بفرتة حرجه جدا ربنا يستر

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *