التخطي إلى المحتوى

بقلم/ م. محمود مهران:

يا مصر مالِك؟ أيه جرالك؟ ناس تغش وناس تُقش والفساد أخدتي عليه… ناس تبكي، وناس تشكي، ناس تصفي، وناس تعكر، وناس تولي، وناس تخلي التمرجي يُقال له (يا بيه) واللي يحبك ويخاف عليكي يبقي سفيه.

يا مصر حاسبي من الخطايا ـ دا اللي يجري ويدور في أرضك ربنا غضبان عليه، لما العدل يكون سلطان ربنا يرضي عليه واللي يخالف يوم مسارك ربنا يغضب عليه.

اللي ناموا معكرين دول ولادك واللي قاموا ينهشوا دول ديابك وكتير خلاص أتوحشوا من كلابك، يا مصر حاسبي علي اللي جاي دا اللي يشيلك هو شبابك، اللي هانوا عليكي يا أما ـ هما اللي يشيلوا ترابك، واللي يصون اللي جاي ـ هما ولادك، بلاش يا مصر تعضي فيهم (بلاش تتلوث ثيابِك).

أنا ابن الجيل المُضحى بيه ـ ذنبي أيه؟ لما يتوه حلمي في حضن وطني وفين ألاقيه، قفلتوا السكة في وشي ليه؟ كنت مستني منكم بسمة أمل أو فرصة عمل أو فكرة ابحث بيها عليه، ضيعتوا كل معني حلو عشت بيه وحلم ناصر والقومية والفقير راحت عليه..

يا أم كل الشقيانين والتعبانين جري لك أيه، ليه تبيعي نبع نيلك ليه تضحي بيه ليه.، لوكل حاكم باع سبيلك تبقي يا مصر عايشه ليه وفاضل أيه لما يغتالوا جنينك فاضل لك أيه السنين تشهد عليكي والحكاية بين ايديكي والتاريخ جوا عينيكي ليه يا مصر تسلمي للي أنتي فيه.

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *