فوعلى لقمة العيش‎

فوعلى لقمة العيش‎
اكل العيش

بقلم/ محمد يسري:

فوعلى لقمة العيش

ابو حكاية متتحكيش

ساكن فى بيت

 كل سجاده من خيش

و بيتعلم فى جامعة

كل دكاترتها بيشربوا حشيش

فطبعا ملقاش علم ينفعه

قام قضى وقته فى الطيش

يادوبك خلص تعليمه

و سلم نفسه لللجيش

و بعدها لقى نفسه زى باقى جيله

عابر سبيله

فوعلى للقمة العيش

و حكايته زى غيره متتحكيش

لأن رفاهيته فى الحياة متساويش

الا يادوبك كام جنيه بقشيش

و ليه نوجع قلوبكم بحكايته؟

ونمرر عيشتكم بعيشته

ونزود همومكم بهمه

و نحكى عن واحد ارزوجكى بسيط

لما بتخلص فلوسه بيعمل عبيط

و يكمل باقى الشهر كأنه سعيد

و كل يوم الصبح

يستنى الرزق الحلال

سواء جه او مجاش

عمره ما فكر فى الشمال

فوعلى لقمة العيش

ابو حكاية متتحكيش

الراجل اللى فى كل شغلانته مسحول

اللى فطاره و غداه و عشاه فول

و لو اتثبت فى شغلانة

مرتبه مبيكفيهوش

دا حتى لما بيبقى خرمان

سجايره الفرط مبتقضيهوش

صاحبنا كأى كائن حى

 فكر فى يوم يتجوز

و فى وسط تفكيره قام مبوذ

سأل نفسه سؤالين

هصرف عليها و على نفسى منين؟

اذا كنت انا فى كل شهر

 بشحت اسبوعين

و لو اتغديت مبتعشاش

كدا العمر هيروح بلاش

بس حياتنا دايما بتلف و تدور

و الراجل مننا من غير الست مقهور

و بيها مستور

قام صاحبنا اتجوز يمكن  يحس بالأمان

و من يومها المستخبى بان

و كل يوم بقى ينام جعان

وفى يوم المدام صرخت

 و جابتله تلت عيال

قام  فجأة حس بحصار

و بدأ ينهق زى اى حمار

و دارت بيه الساقية كأنه بقرة

و تلف الساقية دايما ما دام فى بكرة

فوعلى لقمة العيش

ابو حكاية متتحكيش

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *