الأزرق يطلع بحار .. والأخضر يطلع طيار “للتذكرة بأتوبيس الاطفال”

الأزرق يطلع بحار .. والأخضر يطلع طيار “للتذكرة بأتوبيس الاطفال”
اطفال

بقلم/ ريم حبيب:

ماما حبيبتى .. ماما أنا أهو .. شايفانى .. وحشانى قوى يا ماما .. أنا فرحان وبلعب هنا مع ناس جميلة لابسين أببض وعلى هدومهم شريطة خضرا .. زى إللى كنتى بتحطيها لأختى فى شعرها وهى خارجة.

ماما .. إتطمنى إخواتى معايا وجنبى اهم .. بيلعبوا مع االناس الجميله إللى بالأبيض شوفت جدو و تيتا هنا .. ضحكولى لكن مش اتكلموا.

ماما .. إنتى ليه زعلانة .. آخر مرة كنتى بتضحكيلى وبتصحينى من النوم وخدت اخواتى وشنطنا على ظهرنا وفيها السندوتشات .. ركبنا الباص وهيصه ودوشه وفجأة .. حاسب يا عمو القطر يا عمو  .. ولقيت نفسى فى حته ضلمة .. وبيرموا عليا تراب .

ماما .. إنتى هتزعقيلى علشان هدومى اتوسخت، مش انا يا ماما واللهى إلى وسختها .. ولقيت اخواتى جنبى خايفين من الظلمة .. وجم علينا االناس الجميلة إلى بالأبيض، أخدونا معاهم لفوق .

ماما .. علبة ألوانى خليها معاكى أنا كنت بحب اللون الأزرق وكان نفسك أطلع بحار واخويا يحب الاخضر قلتى وده هيبقى طيار، واختى بالأبيض حلمتى بيها عروسه فى  زفه .

ماما .. متنسيش تبقى تقولى للى خلونا مش هنعرف نشوفك وتشوفينا انتم كلاب ووحشين  ومعفنين ربنا يسامحكم.

ماما .. هما ليه خدونا بعيد عنك، هو أنا مش هنام تانى فى حضنك.

ماما .. أنا عارف إنك انتى سمعانى بس صوت عياطك سد ودانى، أنا لما كنت بعيط كنتى بتخدينى فى حضنك، بس أنا كفى صغير مش هعرف احضنك اوى بس  بصى هحضنك بقلبى  اخواتى بينادوا عليا   هجيلك كل يوم فى المنام .

ماما .. مين الى خلانى ابعد عنك، يا ماما  كنتى انتى وبابا بتتخانقوا على السياسة، بابا عايز ينتخب عمو الى بيقول عن الفلاحين وانتى اخترتى عمو الى بنظاره ودقن وبيتكلم عن الدين وفرحتى وقولتى بقا بابا الرئيس  انا قلتلك انا بابا واحد بس ده شكله يخوف بابا مين عمو ده يا ماما وحش خلانا نبعد عنك وخلاكى تعيطى عمو ده وحش يا ماما  اضربيه بالعصايا.

ابقى روحى زورى اصحابى فى المدرسه وافتكرينى .

ماما .. هو انتى هتنسينى يلا يا ماما هجيلك فى المنام يلا سلام .

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *