غلب حمارى

غلب حمارى
images

بقلم/ آمال عبد الحميد:

غلب حماري
وقادت ف الضلوع نارى
ومش فاهم ومش دارى
فى ايه بيجرى وايه جارى
وايه بيحصل وايه حاصل
وليه الحزن متواصل
ما بين الصدمة والتانيه مفيش فاصل
وبين الظلم والعتمة فى خيط واصل
و كلمة حق ويا العدل
رغم وجودنا محذوفة
و ناس فى حدودنا مخطوفة
وطلعوا خلاص من الخطفة ومتسألشى
بضوء أخضر بأمر جماعة معروفة
سيناريو حوار بيتحضر متفهمشى
وكل الخلق ملهوفة ومشغوفة
فين القصة فين الأطراف وفى الأعراف
آدى الخاطف وآدى المخطوف
وناس عارفين مين الظالم

وليه ساكتين
وناس عايمين مع العايم
ومش فاهمين
وليه القاتل يكون مشهور
يطل علينا م التلفاز
و ليه حق القتيل مهدور
ويولع أهله حتى بجاز
وليه الظلم بقى سايد ومتعمم
وليه الشعب ده قابل انه يتعمم
وأنا بين عقلى و جنونى
على شعرة
وجع قلبى و غصة جوة فى جنابى
من القهرة
وربع فاضلى فى دماغى
عشان الظلم جاب داغى
وبقى زايد وبقى طاغى
وخلى الحزن متواصل
وبين الصدمة والتانية مفيش فاصل
وبين الظلم والعتمة فى خيط واصل

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *