جزيره في المحيط

جزيره في المحيط
603697_658088927541359_358531004_n

بقلم/ رنده جبران:

نفسي أعيش في جزيرة نائية في المحيط

أبنيلي فيها بيت بسيط

مالي نواحيه الدفا

والضحكه مش مستهدفه

ولا النفوس مزيفه

وأسرح في ملكوت ربنا

سبحان ربي من خلق

الاقي الكون كله لوحه مرسومه

متناسقه ألوانها وأجزائها مفهومه

أو بيت شعر في قصيده موزونه

لما تقراها تحرك مشاعر جوانا مدفونه

خايفه تشوف النور خايفه تبوح

لا ماتلاقيش ليها مكان وسط البشر

أرحل بعيد لجزيره نائيه في المحيط

مافيهاش وشوش متلونه

مافيهاش قلوب متلخبطه

في الحزن لسه متبته

مش عارفه تكره ولا تعشق

 ولا تخون ولا تصون

وحدي أنا من غير خداع

من غير بشر علي وشوشها قناع

من غير قلوب زي الحجر

مليانه بحزن وشجن

والابتسامه مقيده

لما بتضحك تحس الضحكه مش ملكها

والفرحه مش من حقها

مع انها طول عمرها

تحلم بفرحه تسكن قلبها

متحرره بضحك وأعلي صوتي بالغنا

مش حاسه ان في قيود علي فرحتي

أو في بشر هايقولوا لا أسكتي

ولا أحس الضحكه غاليه التمن

ومافيش مكان غير للألم

أرحل بعيد وابني حياه كل شيء فيها جديد

من غير خيانه مرتبه أو ضحكه تايهه معذبه

محكوم عليها انها تفضل سجينه مدي الحياه

أرحل بعيد لجزيره نائيه في المحيط

الضحكه فيها ممكنه والابتسامه مضلله

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *