“سلمي صباحي” افتكروني دراع ابويا عشان يلووه .. لاقوني ضهره المستقيم اللي مايتحنيش

“سلمي صباحي” افتكروني دراع ابويا عشان يلووه .. لاقوني ضهره المستقيم اللي مايتحنيش
سلمي صباحي

كتبت – سمر سالم :

دونت “سلمى صباحي” نجلة حمدين صباحي مؤسس التيار الشعبي،اليوم صباحاً علي صفحتها علي  موقع التواصل الاجتماعي فيس بوك كلمات تعبر عن مارائته واستفادته من محنتها تحت عنوان”السر”

فبدأت سلمي بكتابة

السر .. اني دقت جزء من الظلم اللي داقه ابويا

السر .. اني كنت بشوف صمود امي ايام وشهور لما كانوا بيعتقلوا ابويا

السر .. ان بعد 6 سنين جواز اكتشفت في اشرف حاجات جديده واتأكد شعوري انه هدية ربنا ليا ..

السر .. ان المحامين العظماء حامد جبر ومحمد منيب “عمامي” اللي اتولدت وسطيهم وكبرت قدامهم دافعوا عني بقلب الاب ولما رجعت البيت اخدوني في حضنهم وبكوا من فرحة رجوعي

السر .. ان كل المحامين الكبار الاعزاء اصدقاء ابويا واللي بيعتبروني زي بنتهم دافعوا عني متطوعين وبقلب صادق جدا

واضافت  ايضا  ان  السر.. ان المحامي المحترم خالد ابوبكر ظهر في حياتي فجأه ليلة التحقيق سمع قصتي وطلب مني اعمله توكيل عشان يقف جنبي تطوعا منه وماسابنيش لحظة ..

السر.. ان صحابي الجدعان “بنات ورجاله” كانوا واقفين طول الايام في النيابه وقدام القسم بس عشان يحسسوني انهم جنبي ..

السر .. اني اكتشفت عظمة حب الناس ودعواتهم الصادقه كانت بتوصلني وانا لوحدي في الحجز

السر.. ان ظباط قسم العجوزه كلهم باختلاف الرتب كانو بيتعاملوا معايا “كانسانه”

السر .. ان ملازم اول اصغر مني بكام سنه من القسم قاللي “لما كنت في ثانوي كنت بتابعك في برنامج شبابيك واحس انك اختي انا واثق انك بريئه”

السر .. ان رئيس ووكلاء نيابة العجوزه في منتهى الاحترام

السر .. ان رئيس نيابة العجوزه رجل عنده ضمير مهني حقيقي بعد تحقيقات استمرت 3 ايام وبعد ما كتب مذكره تفيد اني مجني عليا ولست مدانه جه القرار بالحبس قاللي “انا بعتذرلك”

السر .. اني لما رجعت البيت كنت مشتاقه اوي لحضن “حلم” بنتي ولما حضنتها لقيتها اتعلمت جمله جديده “وحشتيني يا ماما”

السر.. اني عرفت قيمة سريري .. واني بعد 5 ايام من غير نوم نمت لمدة 6 ساعات فيهم البركه ولما صحيت لقيت 654 ميسد كول و 76 رساله بيباركولي..

السر.. اني لقيت اسمي “ستاتس” على الفيس بوك واكتر من 30 مقال باقلام كبار الكتاب عني في الجرايد والافات التويتات بتدعمني..

السر.. اني حسيت بوجع المظلومين

السر.. ان اكتشفت ان الظلم بيقوي

السر.. في سبحة “الطاهر” عمر طاهر

السر.. في الايه الكريمه “لا اله الا انت سبحانك اني كنت من الظالمين” اللي كتبتها على جدران الحجز عشان اي حد يدخل الحجز ده يقراها .. سحر ..

السر.. اني لقيت الوقت اللي افتكرت فيه كل حاجه حلوه ربنا اكرمني بيها في حياتي ولقيت نفسي محظوظه جدا بالاهل والاصحاب والاحبه..

كما اضافت ايضا    سلمي :  السر.. ان لما افتكروني دراع ابويا عشان يلووه .. لاقوني ضهره المستقيم اللي مايتحنيش ..

السر.. اني افتكرت لما كان ابويا بيقعد معايا بليل في البلكونه اغنيله “حببتي من ضفايرها طل القمر” وهو يقرالي شعر من ديوان محمود درويش “لماذا تركت الحصان وحيدا” ودايما كانت تشغلني جمله في القصيده دي عرفت معناها دلوأتي “مثلما كنت تحملني يا أبي”..

واختتمت سلمي كلامها  قائلة:

ببساطه ..
السر ..
انك تعرف تشوف “المنحه” المستخبيه في قلب “المحنه”..

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *