موافقة

موافقة
images

بقلم/ رنده جبران:

احني راسك قول موافقه

كمل لسكه المنافقه

اوعي تسأل هي ليه الدنيا واقفه

ولا ليه الحق محتاج المرافقه

والمظالم لسه ليه في القلب راشقه

والجروح مبتلتئمش

والصواب مبيتعملش

يلا هيص ..قول افندم

ستف الامر وهندم

ايه عملتوا بالنيابه؟؟

حسبه فلوس ولا دي حسبه ديابه

كان خيارنا فيه تحدي

ان بيكم ممكن الغمه تعدي

والفرح يجي يزورنا

بس مبقاش غير غرورنا

وطمعنا بيعايرنا

احني راسك قول موافقه

كمل السكه المنافقه

المعالم هي هي والقضيه بردو هي

والطغاه لسه في مكانهم

والحقوق ضايعه مابينهم

وأنت بس قول محاضره

في المباديء والمشاعر والمخاطره

بس فين هي الحقيقه

لسه مش باينه حدودها

والمظالم لسه مش لاقيه ردودها

احني راسك قول موافقه

كمل السكه المنافقه

اللي خدتو منكو شفقه

وبردو لسه الدنيا عتمه

والنعيم بقي نفسه نقمه

والجعان مش لاقي لقمه

والفقير مش لاقي هدمه

واللي تايه في الشوارع

واللي مظلوم حقه ضايع

والبشر صارو بضايع

بيبيعوهم بالرخيص

واللي معاه مبيشتريش

وأنت هيص

احني راسك قول موافقه

كمل السكه المنافقه

أصل لسه العجله واقفه

والبدايل مش مناسبه

وبالمناسبه حقي مش ممكن يضيع

احنا شعب مش مطيع

احنا بنموت ف المشاغبه

حضره العضو الموقر

ألف شكرا…

بالسلامه

شعبي راح يفضل يناضل

  لحد ماتقوم القيامه

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *