الجبهة الشعبية بعد 300 يوم من حكم الإخوان تخرج بأنت ساكت لية

الجبهة الشعبية بعد 300 يوم من حكم الإخوان تخرج بأنت ساكت لية
284261_507799092588863_1460905354_n

كتب – محمد جابر إمام:

قامت الجبهة الشعبية بطباعة الاف النسخ من بيان بعنوان انت ساكت ليه ؟ . وتبدأ في توزيعه من الغد بدءً من الإسكندرية ثم باقي محافظات مصر .

ويحتوى هذا البيان علي مجموعة من الانتقاضات، ونصه كالتالي

انت ساكت ليه ؟

بعد 300 يوم من حكم الإخوان نحب نستعرض إنجازات مشروع النهضة

نجح مشروع النهضة في رجوع الداخلية لنفس دورها القذر قبل الثورة وبقت تحمي مكتب الإرشاد وتسيب الأزهر والكاتدرائية لعصابة تقتحمهم وتخرب فيهم لمجرد إن العصابة دي تبع الحزب الحاكم

نجح مشروع النهضة في توفير العيش للمواطن عن طريق وزير تموين منح حزب سياسي اللي هو الحرية والعدالة حق توزيع العيش على المواطن بالكوبونات علشان يتحكموا في لقمتنا من فلوسنا وضرايبنا

نجح مشروع النهضة في توفير البنزين لدرجة إننا مش لاقيينه والطوابير عليه بتقفل شوارع . حتى أنبوبة الغاز وصلت لخمسين جنيه في بعض المناطق ومش لاقينها

نجح مشروع النهضة في الإقتراض من صندوق النقد الدولي اللي من شروطه الغاء الدعم من على الغلابة ورفع الضرايب . وطبعاً ده هيزود ديون مصر وهيكون عبء على الأجيال اللي جاية

نجح مشروع النهضة في تعيين الإخوان في كل المناصب الهامة في البلد تحت أسم التمكين بغض النظر عن الكفاءة أو حجم المسئولية .

نجح مشروع النهضة في إهانة القضاء والتعدي عليه وعلي أحكامه ومحاصرة مقراته من شوية جماعات إرهابية وإجرامية علشان يمرروا دستورهم ويفرضوا نفسهم على الشعب المصري

نجح مشروع النهضة في إن واحد زي خيرت الشاطر ملهوش أي صفة في الدولة يدير جهاز زي جهاز الأمن الوطني علي سمع وبصر كل الشعب المصري في أجهزة الإعلام ومفيش تكذيب واحد طلع يثبت عدم صحة الكلام ده

نجح مشروع النهضة في قطع الكهرباء يومياً بالساعات عن بيوتنا وعن مستشفايتنا بالإضافة إنهم بيحصلوا عليها مصاريف نظافة ومع ذلك مفيش صندوق زبالة واحد في 90% من شوارع مصر

كل ده من إنجازات مشروع النهضة ولسة في غيرها كتير وبردوه ساكتين وبنقول نديهم فرصة . بس هنفضل نديهم فرصة لحد أمتى ؟ لحد ما بلدنا تتباع قدام عنينا ونظلم الأجيال اللي جاية معانا بسبب فشل وسوء إدارة من ناس مش عارفة يعني أيه دولة مصر وكل همهم حلمهم ودولة المرشد وطز في مصر وفي اللي في مصر وفي اللي خلفوا مصر زي ما قال مرشدهم السابق . لسة بردوه هنفضل ساكتين ؟
يسقط يسقط حكم المرشد

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *