اسعاد يونس: انا اول امراة مصرية مش منتخبة .. ما انا مارشحتش نفسي

اسعاد يونس: انا اول امراة مصرية مش منتخبة .. ما انا مارشحتش نفسي
اسعاد يونس

كتب- معتز راشد:

في مقال جديد بعنوان (إنجازات.. حبشتكانات) للساخرة اسعاد يونس تسخر فيه من كتاب (انجازات الرئيس مرسي) تقول يونس “أنا أول امرأة مصرية مش منتخبة .. مانا مارشحتش نفسى فمحدش انتخبنى .. أنا أول امرأة مصرية مش ملتحية.. أيوون.. وإن كنت أتمتع بزغب خفيف فوق الشفة العليا بس ربنا يخليلنا المزيلات بقى..

أول امرأة مصرية مدنية .. مارحتش التجنيد.. رفضونى عشان عندى تقوس فى الساقين وبامشى زى مخرطة الملوخية.. رغم إنى حاصلة على شهادة تقدير فى الفتونة، حيث إننى كنت ضريبة نار بريمو.

أول امرأة مصرية ببص يمين وشمال وانا بعدى الشارع.. ماهو إن ماعملتش كده حاتهف.. أول امرأة مصرية تقمع البامية وتعملها ببوزة.. مش اقطشها كده وتبقى مفلطحة.. ومن إنجازاتى التى سيتحدث عنها التاريخ أننى لما أعوز أطبخ بروح المطبخ.. أى والله..

أول امرأة مصرية تصحى الصبح.. أومااااااال.. بس ساعات أضرب خُم لحد الضهر، لكنها استثناءات يعنى.. ولدى من الإنجازات الشبيهة أكوام أكوام..

جارى الرصد والتسجيل.. نراكم عند طباعة الكتاب الأول عن إنجازاتى التى سأصعق بها العالم المتحضر المتقدم.. ومحدش أحسن من حد !!”

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *