عبد الصبور

عبد الصبور
مصري

بقلم/ آمال عبد الحميد:

تمام يا افندم .. يا افندم تمام
وأكبر سلام .. وأجدع كلام
مفيش حد يقدر يقول غير كده
وأشيتنا معدن وآآآآآآخر رضا
و لا فى بطالة .. ولا ناس عطالة
ولا كوام زبالة

وعايشين فى حالة بجد استحالة
يعيش حد غيرنا و بالشكل ده
ولا بينا واسطة .. ولا بينا كوسة
ولا فى عنوسة ف بلدنا العروسة
ولو كات جاموسة يجيلها العدل
شبابنا بيتعب ونازل عمل
مدبر جهازه ومهر لجوازه وكله أمل

و فاضية القهاوى ولا حد غاوى
يولع ف شيشة .. يلفلف حشيشة
يغيبن علينا ولا يختشيشا
ويعمل جريمة وابن اللئيمة
يقول كنت غايب

ولا حد سايب بلدنا وناهب
معاه أى مال وصحتنا عال
مفيش أى ضغط ولا فى انفعال
وحلوة العيال بتجرى وتلعب
ولا ف مرة تتعب

ومستشفياتنا نضيفة وغالب
عليها النظام لا يقدر يهوب
قط بشوارب وجنبك ينام
ولا حد يدخل ويطلع حطام
ولا حد ميت بغلطة طبيب
ولا يوم فقدنا لدينا حبيب

ولا زحمة خالص وميت ألف بيب
ولا فى مهانة ولا فى تعذيب
ولا فى مظاهرة تقفل فى شارع ويعطل
ولا حد يضرب ويسجن ويسحل
ولا حد يحرق يولع ويهرب

ولا الحاجة غالية.. ولا قلوبنا للهم شايلة
و مالين عنينا بنطلب فى ثانية
يكون بين ايدينا
ولا فى مشاكل بنشرب وناكل
و نعمل ف واجب لكل اللى داخل

وأهو العيش يفرح ومن غير طابور
وأهو الشعب رييح وخد عالخابور
ما بيقولش آآآه ه ه وأعلن رضاه
ولا صوت بيطلع .. ولا عاد يثور
وشايل حجارة تطلع عمارة

تشيد قصور
وسلسل ارادته
وحممل حجارته
فوق أم طاقته
وغير بطاقته بعبد الصبور

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *